A ARCA DA MARGA.
A arca é o lugar onde as sensacións esperan, protexidas e quentes. Velaí están ata que alguén, con interese e curiosidade, abra a tampa e remexa na súa procura.
E que podes atopar? Pois as partituras, as cancións, as audicións, os vídeos, os xogos que usamos na rede, e outros enlaces con información útil.
Velaquí vai máis material para descargar en casa repasar neste tempo virado. Lembra as distintas actividades que temos feito en clase para distinguir as familias instrumentais (organizando os instrumentos da aula, con láminas, con xogos de cartas, con xogos na pantalla, con xogos no ordenador...)
En publicacións máis antigas deste mesmo blogue tamén atoparás a clasificación dos instrumentos.
Entrade nelas para refrescar os teus coñecementos. Aproveita para facer as actividades dos enlaces. Pero despois haberás de colorear a ficha que segue.
Colorea os instrumentos de cada familia da mesma cor
Nestes días de tempo virado seguramente pasaredes por sensacións ben distintas ó longo do día. Haberá ratos que pasen voando, e outras veces pode que teñades un "bule-bule" interior que faga que a tarde non de pasado. Velaí vai unha cantiga estupenda de Ana Mª Fernández con Música de Manuel Rico.
Completa o musicograma (editado por GaliNova) coa hora do reloxo e coa figura musical que corresponda.
Velaí un vídeo que estes días está percorrendo os grupos de whatshap.
Alerta e poderemos aprender algunha cousa.
1.- Cantos instrumentos sonan?
a) 2 b) 3 c). 4 d) 1
2.- Cales son?
3.- Marca a que grupo pertencen?
a) Aerófono b) Cordófono c) Idiófono d) Membranófono
4.- Sabes o nome da persoa que compuso esta peza?
a) Beethoven b) Mozart c) Brahms
Presta moita atención ó video que segue:
Pois si. É a mesma melodía do vídeo anterior. É unha composición do alemán Johannes Brahms, que no século XIX inspirouse nas ledas danzas populares de Hungría para compoñer 21 pezas para piano (a catro mans). De todas, a danza nº 5 é a máis coñecida.
5) Somentes unha destas persoas é Johannes Brahms. Indica cal.
Johannes Brahms viviu entre 1833 e 1897. Un século de moitos cambios e innovacións.
6) Marca que eventos sucederon nos tempos que viviu.
a) Inventouse a fotografía b) Inventouse o avión c) Inventouse a lavadora
e)inventouse o teléfono d) Utilízase a electricidade nas casas e nas industrias
Velaí unha interpretación ó piano. Escoita moi atentamente para resolver o que segue
Xa sabes que a melodía organízase en frases. Se te concentras poderás distinguir tres frases. Escoita a peza as veces que precises ata descubrir cal das seguintes propostas é a forma que escolleu o compositor.
Ben seguro que a palabra que más escoitaches nesta última semana foi "coronavirus". Velaí tes o responsable de tódos estos cambios na nosa vida.
Que te parece se facemos música con el? Agora que xa o vimos, imos facer que sone. Cada vez que apareza a imaxe do coronavirus ti haberás de interpretar este ritmo:
Escolle algún obxecto para facer o seu son. Podes utilizar unha pelota pequena (como tambor) e petar nela cunha culler (como baqueta). Se non te convence, busca outro "instrumento". Para facer unha axeitada selección pensa que haberás de ir variando a intensidade do son, pero ten moito coidado de non molestar co ruído.
Imos aló. Pon a túa mente a funcionar e descifra estes esquemas. Podes interpretalos sucesivamente e, despois, facer combinacións xogando coa orde e repetindo algún deles. Seguro que pronto inventarás ti series novas combinando os distintos tamaños. Divírtete e disfruta.
😉 Se non sabes ler música e non entendes eses símbolos raros de enriba,
non te preocupes. Podes resolver dando un golpe coa culler no balón por
cada un dos coronavirus que atopes. Pero haberás de prestar atención e petar máis ou menos forte según o tamaño do virus.
Como parece que temos por diante un tempo virado, imos ver de disfrutar coa música na nosa casa, coas cousas que temos a man.
Propóñovos colorear e recortar as follas da imaxe que vos presento.
Se non tes maneira de imprimilas, ben sei que saberás copialas nun papel e colorealas ó teu xeito.
Agora vaites á cociña. Pide permiso para remexer nos caixóns e procurar algúns obxectos que utilizarás para facer música. Velaí algunhas ideas:
Pois agora xa tes o instrumento e a partitura: A TOCAR!
1 - Pon as follas cara abaixo e, ó chou, escolle unha para tocar. Escolle outra e toca. Engádea á primeira e toca as dúas seguidas. Poderás seguir engadindo ata completar a partitura con todas as follas 2 - Procura algunha persoa para tocar contigo. Pídelles que escollan o seu instrumento e volvedes a empezar ó xogo. a) tocades ó unísono (as dúas persoas ó mesmo tempo) b) tocades en eco (un empeza e a outra persoa o repite) c) organizade a interpretación de xeito que teñades partes de solo (cada un só) e outras ó unísono (ámbalas dúas persoas xuntas) 3 - Intenta aumentar a orquestra con máis instrumentistas e, senón queres inventar novos esquemas rítmicos, organiza a partitura con partes que se repiten a modo de retrouso (estribillo)
Un dos instrumentos máis popular de Portugal é A GUITARRA, un cordófono distinto da "guitarra española". Mira con calma e atención as imaxes e compara.
A GUITARRA PORTUGUESA ten unha forma é unha sonoridade ben peculiar. Hai cincocentos anos un dos instrumentos máis coñecidos en toda Europa era "a cítara". De Alemania a Italia, de España ás Illas Británicas o son da cítara acompañaba as cancións e danzas en calquer aldea, vila ou cidade.Pouco a pouco van aparecendo novos instrumentos, e a xente procura sonoridades diferentes. E así, tamén paseniño, as cítaras quedan esquecidas nos faiados das casas, esmorecendo en toda Europa... menos en Portugal. Nos barrios populares de Lisboa, de Porto, de Braga, de Coimbra, de Guimaraes... os músicos populares seguiron tocando un tipo de cítara que hoxe coñecemos como GUITARRA PORTUGUESA.
É un cordófono cunha caixa de resoancia en forma de pera, feita on madeira de Pau Santo, abeto ou chopo, cun mastro de dezasete trastes. O mastro remata nunha peza plana en abanico onde tensan as cordas en parafusos.Ten unha ducia de cordas de metal organizadas coma seis parellas. Para tocala, a persoa pulsa as cordas cos dedos polgar e índice, axudándose coas unllas ou con púas de plástico metal o nácar.
Nas tabernas das vilas portuguesas, a "guitarra portuguesa" acompañaba cancións tristes e melancólicas, que describen a frustración e o fatalismo das difíciles vidas de obreiros, mariñeiros e demáis clases populares. A Guitarra Portuguesa acompaña O FADO.
O escritor portugués Fernando Pessoa escribiu: «O fado non é alegre ni triste. Formou a alma
portuguesa cando non existía e desexaba todo sen tener forza para
desexalo. O fado é a fatiga da alma forte".
Escoita a unha das máis famosas cantoras de FADO: AMALIA RODRIGUES.
Nesta gravación canta un fado moi popular: Uma casa portuguesa
Outra das grandes cantoras: MARIZA.
Canta Gente da miña terra
35 artistas cantam “Lisboa Menina e Moça”, um poema que se converteu en tema emblemático de Lisboa, do Fado
Alerta! Vas coñecer un dos aspectos máis curiosos do SON: a duración. Seguramente xa te decataches que hai sons longos e outros curtos. E incluso hai silencios... e non son todos iguais; tamén algún silencio dura máis que outro. Iso sucede porque o son dura, é dicir, o son ten duración. Hai tempo que as persoas que tocan instrumentos acordaron como representar a distinta duración dos sons. Decidiron utilizar AS FIGURAS MUSICAIS.
Velaí déixovos un vídeo para coñeceres AS FIGURAS MUSICAIS
Velaí un xogo para identificar as figuras co seus silencios e os nomes que lles corresponden.
Proba a resolver esta actividade. Terás que emparellar as figuras con cadanseu silencio
Velaí unha actividade na que farás traballar a túa memoria ó tempo que procuras emparellar as figuras co silencio que lle corresponde.
Agora que xa coñeces as FIGURAS MUSICAIS, intenta recoñecer or ritmos que sonan neste xogo.
Velaí vai un esquema das FIGURAS MUSICAIS (FIGURAS E SILENCIOS), como se representan e a duración de cada unha delas.
